Iglesia ni Cristo Crisis

Nakalulungkot ang kasalukuyang kaganapan sa Iglesia ni Cristo...
sana makabalik siya sa kanyang dating ningning...
iyong  kalagayang "ilaw at asin" siya ng sanlibutan...
iyong pinag-uusapan siya dahil sa dalisay niyang aral...

Sana makabalik siya sa kalagayang iyon...

Bakit ayaw nating pakinggan kung sino man si Antonio Ebanghelista?
Sa tingin ko, ang tanging hangarin naman niya ay malinis sa katiwalian ang INC.

Mmmm... pero baka mali ako
o baka kayo ang mali...

Ama, kahabagan mo po ang iyong kawan.

Tula Para Kay Ka Felix

Nang pasimulan mo

ang iyong gampanin bilang huling sugo,

ikaw ay nilait, inusig ng tao;

pinagtawanan ka nang marinig sa iyo

ang mga doktrina na anila’y bago.

Ang di nila alam

at hindi nagawang sampalatayanan,

Mahal na Ka Felix, ikaw ay hinirang;

sugo ka ng Ama na kinasangkapan

nang muling bumangon ang kay Kristo’ng kawan.

At nagpatuloy ka

sa iyong gampaning kaloob ng Ama;

ma-araw, ma-gabi ay walang pagod ka

sa buong ningas mo na pagdo-doktrina

at pagpapahayag ng Kanyang salita.

Palibhasa’y tapat

at taos-sa-puso ang iyong pagtupad

pinagpala ng Dios ang lahat mong lakad;

iningatan ka Niya at pinagtagumpay

sa masamang balak ng mga kaaway.

Kung pumanaw ka man

at pinagpahinga ng sa iyo’y humirang,

Mahal na Ka Felix, ang totoo po n’yan,

itinuturing kong hindi ka lumisan

kapiling ka namin sa kasalukuyan. 

Nakikita kita

sa pamamahalang higit pa sa labis

ang pinupuhunang pagmamalasakit;

nadarama kita sa bawat kapatid

 na handang sumunod kahit pa magtiis.

Ka Felix! Ka Felix! Ang tula pong ito

ay inihahandog sa alaala mo!

Awit Ng Isang Mang-aawit

Ama ko! Ama ko! Mula r’yan sa langit

na tinatahanan ng iyong pag-ibig,

dumungaw Ka, Ama,

at Iyong pakinggan ang hapis na tinig

ng aba Mong lingkod sa kanyang pag-awit.

Sa pagdadala ko ng aking tungkulin,

Ama ko, gawin Mo akong masunurin;

maanong likhaan

ng isip at puso na mapagpasakop

ang kalooban Mo ay laging masunod!

Sa dako pa roon ng aking lakbayin

aking natatanaw, may bagyong parating;

nag-aalimpuyo

ang ihip ng hangin at kumukulog pang

waring tinatakot ang Iyong hinirang.

Ama ko! Ama ko! Ako’y kahabagan

pagsapit ng bagyo’y pakisaklolohan;

yakapin Mo ako,

huwag Mong itulot na ako’y tangayin

niyaong bagyong iyong pagsubok sa akin!

Kung sa pagdadala ng aking tungkulin

buhay ko’y mapatid, hininga’y kapusin,

salamat po, Ama,

at itinulot Mong dadalhin kong yaman

ang aking tungkulin sa aking libingan!

At sa pagparito ng Bugtong Mong Anak

sa araw na iyong araw na mapalad,

Ama, kahabagang

sa mangaliligtas na mga hinirang

ay pakisama Mo ang aking pangalan!

Payagan Mo, Ama, na hanggang sa langit

ako ay magiging Iyong mang-aawit!

                                                Amen

“Sampung Pangunahing Tungkulin ng Bawat Kaanib Sa Iglesia Ni Cristo Upang Mamalagi Sa Kaligtasan”

                                        Sa pamamagitan

                                        ng pamamahala sa Iyong Iglesia,

                                        Ama, malinaw pong naririnig Kita;

                                        sinasabi Mong ako’y Iyong mahal—

                                        ililigtas ako kung magpakasakdal.

                                        Nakikipagtipan—

                                        Ama, naririto ang sagot ko naman

                                        sa ibinigay Mong mga kautusan;

                                        sa aking pagtupad, maanong gabayan,

                                        pakipagpala po ang Iyong hinirang.

                                        (1)    Iibigin kita—

                                        pagsusumikapang sa Iyong paningin

                                        ay mamamalaging tapat na alipin;

                                        ipinangangako na laging susundin

                                        ang mga utos Mo at mga tuntunin.

                                        (2)    Sa mga pagsamba

                                        at pagkakatipon sa Iyong Iglesia

                                        ay tinatanggap ko ang Iyong salita,

                                        kaya sa Iyo, Ama’y ang lagi kong sumpa

                                        pagtatapatan ko ang ganitong gawa.

                                        (3)    Di ako uurong—

                                        hindi na babalik sa kapahamakan

sapagkat tiyak ko na ang kaligtasa’y

sa Iglesiang ito lamang makakamtan—

Iglesia Ni Cristo ang kanyang pangalan.

(4)    Sumasampalataya—

sa mga bagay Mong hindi nakikita

nananalig akong buong-buo, Ama,

sa Bugtong Mong Anak, sumasampalataya,

Kayo aking Ama’y pinakasasamba.

(5)    Pagsusumikapang

laging malugod Ka sa Iyong hinirang—

ipinangangakong di ko lalakaran

ang buhay na liko at gawa ng laman,

mabubuhay ako nang may kabanalan.

(6)    Sa Iyong Iglesia

ang aming turingan ay magkakapatid;

Ama, sa panig ko, anumang sasapit

dito sa puso ko’y hindi mawawaglit

ang pagmamahal ko sa aking kapatid.

(7)    Pagtatalagahan

gawang paghahandog pati paglalagak

pagkat mula rito ang gugol-pantatag

at pagpapaayos sa mga sambahan

kung saan ka namin pinapapurihan.

(8)    Ako’y magbubunga—

ako ay patuloy na magsisigasig

na makapag-akay ng mga babalik

sa mga aral Mo na tinatangkilik

dito sa Iglesiang Iyong iniibig.

(9)    Pakamamahalin—

ang ipinagkaloob sa aking tungkulin

ay taos-sa-puso na laging tutupdin;

pagtatalagaha’t tapat na dadalhin

nang upang huwag Mong bawiin sa akin.

(10)    Walang reserbasyong

ako’y pasasakop sa pamamahala

pagkat ako, Ama’y sumasampalatayang

sinugo Mo sila upang pangunahan

ang pagsamba namin sa Iyong pangalan.

(Nagmamakaawa—

hanggang dito, Ama’t ako’y umaasa,

na gagabayan Mo ang aking paggawa

huwag pong itulot na ako’y manghina…

sa Banal Mong Bayan, tayo’y magkikita!)